Јунајтед има „чудо од дете“: На 14 години постигна хет-трик за 22 минути (ВИДЕО)

31 август 2025 - 16:35

Манчестер јунајтед според најавите од Островот, има „чудо од дете“ во своите редови и тоа, 14-годишниот Џеј-Џеј Габриел кој ги освои симпатиите на луѓето во клубот откако блесна со хет-трик за само 22 минути на натпревар за тимот до 18 години.

Младинците на „црвените ѓаволи“ убедливо го совладаа Дерби Каунти со 4-0, а младиот Габриел го отвори резултатот уште во 5-та минута, а потоа погоди и во 14-та и 27-та, комплетирајќи хет-трик.

Иако досега има само три настапи за овој состав, младиот офанзивец веќе запиша пет погодоци, што ги натера навивачите дури да бараат да добие шанса и во првиот тим.

Сепак, тренерот Рубен Аморим засега не планира да го вклучи Габриел во сениорскиот состав, но не е исклучена можноста младиот талент повремено да тренира со првиот тим, со цел полесна адаптација на повисоко ниво.

Поради неговиот стил на игра многумина на Островот го споредуваат и со Ламин Јамал.