Зидан има јасна идеја за Мбапе: Ѕвездата на Реал се сели на омилената позиција

23 септември 2026 - 22:56

Зинедин Зидан почнува нова ера на клупата на француската репрезентација, а првите тактички промени веќе се наѕираат. Новиот селектор планира да игра во формација 4-3-3, а во центарот на вниманието е Килијан Мбапе.

За разлика од последниот период под водство на Дидие Дешамп, Мбапе повторно би требало почесто да игра на левата крилна позиција. Зидан јавно потврди дека му се допаѓа капитенот на „триколорите“ токму таму, додека Усман Дембеле би бил користен како централен напаѓач.

На десната страна се очекува да дејствува Мајкл Олисе, со што Зидан би добил тројка во нападот составена од Мбапе, Дембеле и Олисе.

Мбапе на Светското првенство во 2026 година најчесто играше како централен напаѓач, но претходно покажа дека може да биде исклучително опасен и од левата страна. Токму на таа позиција имаше значајна улога и на Мундијалот во Катар во 2022 година. Зидан, кој ја презеде Франција како наследник на Дешамп, со новиот систем сака да внесе поинаква тактичка поставеност. Наместо формацијата 4-2-3-1 која ја користеше Дешамп во последниот период, новиот селектор се определува за 4-3-3.

Првиот голем тест за новата Франција ќе биде натпреварот против Турција во Лигата на нации, со кој Зидан и официјално ќе го започне својот мандат.