Нејмар го спаси Сантос од испаѓање, па одлучи: Морам на операција!

08 декември 2025 - 09:30

Екипата на Сантос синоќа го победи Крузеиро и обезбеди опстанок во елитната бразилска лига, а најголема заслуга за ваквото сценарио има Нејмар кој одигра неколку извонредени натпревари претходните недели.

Откако вчера беше остварена целта, некогашниот суперстар на Барселона откри не толку убави вести. За неколку дена тој ќе мора да оди на операција на коленото со цел да заздрави навреме за Светското првенство.

„Ова беа тешки недели за мене. Сакам да им се заблагодарам на сите што ми помогнаа. Да не беа тие, немаше да можам ниту да ги играм сите овие натпревари поради повреди. Сега ќе одморам малку, а потоа ќе морам да го оперирам коленото“, рече Нејмар.

Селекторот на бразилската репрезентација Карло Анчелоти неодамна изјави дека би го земал на Светското првенство ако биде во посакуваната форма, па Нејмар со сите сили ќе се обиде да ги исполни неговите барања.