Можен е голем скандал: Се истражуваат облози на „Златната топка“!

Група од 12 профили го погодила точниот редослед на првите пет фудбалери во овогодинешниот избор за „Златната топка“. За обложувањата биле вложени повеќе од 264.000 долари, а заработката достигнала речиси 200.000 долари.

Како што објави францускиот медиум „Апсајд“, спорните профили биле отворени во периодот од 1 до 20 октомври и покажувале многу слични обрасци на однесување. Тоа предизвикало сомнежи дека зад нив стои исто лице или организирана група која можеби располагала со доверливи информации пред официјалното објавување на резултатите од гласањето.

Хари Кејн ја освои „Златната топка“, пред Килијан Мбапе, Ламин Јамал, Родри и Лионел Меси. Она што е особено интересно е дека спорните профили не се обложувале само на името на победникот, туку го погодиле и точниот пласман на првите петмина фудбалери.

Според достапните податоци, на различни исходи поврзани со изборот биле вложени вкупно повеќе од 264.000 долари, додека добивката надминала 200.000 долари.

Идентификувани биле 12 профили отворени во период од дваесетина дена пред церемонијата. Дури седум од нив немале активности на ниту еден друг пазар за обложување, а шест ги поставиле своите први облози само 15 минути пред почетокот на свеченоста. Дополнителни сомнежи предизвикал и еден од профилите, кој првично се обложил на победа на Хари Кејн. Откако вредноста на облогот пораснала, корисникот го продал и парите ги пренасочил кон обложување на точниот пласман на првите петмина.

Особено внимание привлекол и профил од кој биле уплатени облози за точниот редослед на првите пет фудбалери. На 1 октомври бил поставен облог дека Кејн ќе ја освои наградата, а во следните недели биле додавани облози и за останатите позиции. За петте облози биле вложени вкупно 14.000 долари.

Откако „Апсајд“ ги доставил своите сознанија до „Франс фудбал“, организаторот на наградата покренал истрага, а за случајот ја известил и полицијата.