Модриќ, Нејмар и Роналдињо испратија пораки кои кршат срца за збогувањето на Меси!
Трибините на стадионот „Монументал“ во Буенос Аирес беа исполнети со над 80.000 навивачи, откако сите билети за овој настан беа распродадени за помалку од два часа. Во пресрет на натпреварот, градот Нуњес и сите приоди кон стадионот беа целосно блокирани од фанови, локалните власти ја продолжија работата на метрото и организираа „Фан Фест“, додека над Росарио леташе хеликоптер кој носеше џиновски аргентински дрес со бројот 10. Камерите го уловија капитенот како брише солзи додека тимскиот автобус патуваше од базата Езеиза кон стадионот низ шпалир од луѓе кои вееја знамиња.
Збогувањето на Меси прерасна во глобален спортски настан, со пораки кои пристигнуваа од неговите најблиски соиграчи, но и од најголемите ривали. Бразилецот Нејмар, со кого Меси ја делеше соблекувалната во Барселона и ПСЖ, истакна дека светот останува вечно благодарен за неговиот придонес.
„Не ти се заблагодарува само Аргентина. Светот ти се заблагодарува за сè што направи за фудбалот. Фала ти што направи уште повеќе да го засакам фудбалот“, порача Нејмар.
Честитка испрати и уругвајскиот напаѓач Луис Суарез, кој му порача да биде исклучително горд на заслуженото признание од луѓето и на сè што претставуваше за својата земја. Посебно емотивно беше обраќањето на Роналдињо, човекот кој му помогна на Меси на самите почетоци во Барселона и му асистираше за неговиот прв сениорски погодок.
„Какво задоволство и каква радост што од првиот ден бев дел од твојата приказна, брате. Направи толку многу да се смееме и да уживаме во фудбалот. Твоето име е во историјата на твојата земја и на целиот свет“, напиша Роналдињо, додавајќи дека Меси го остварил сонот на секое дете да стане светски првак со својата држава.
Од аргентинскиот виртуоз се прости и капитенот на хрватската репрезентација, Лука Модриќ, кој во изјава по натпреварот меѓу Хрватска и Шпанија се потсети на бројните меѓусебни битки во изминатите две децении.
„Што да се каже за Меси? Жал ми е што заминува, но тоа е негова одлука и треба да се почитува. Го освои Светското првенство кое го посакуваше. Беше задоволство да се игра против него, иако многу патев и со Хрватска и со Реал Мадрид. Тоа беше задоволство да се гледа. Тој е единствен играч и му посакувам среќа“, изјави Модриќ.
На трибините на „Монументал“ беше присутен и Серхио Агуеро, кумот и долгогодишен соиграч на Меси од сите младински и сениорски селекции. Тој истакна дека знае колку Меси пател во тешките моменти со репрезентацијата, додавајќи дека секогаш ќе биде тука за него, за заедно да разговараат, да пијат мате, да се смеат или да плачат.
За разлика од некои претходни репрезентативни проштални натпревари, неговиот соборец Анхел Ди Марија, со кого ги помина сите загубени финалиња пред да ги освојат Копа Америка, Финалисима и Светското првенство во Катар, одби да добие симболични минути на теренот.
„Не, готово е. Ќе го гледам однадвор и ќе уживам, како и сите Аргентинци, во овој последен танц“, нагласи Ди Марија.