Инстант карма: Послуша неспортска наредба од тренерот, па беше брутално нокаутиран со лакт (ВИДЕО)

Борец кој послуша неспортска наредба од својот тренер да нападне небранет противник на кого му падна заштитната гума за заби, на крајот заврши брутално нокаутиран со спектакуларен удар со лакт, предизвикувајќи вистинска ерупција на трибините. Сè започна со невообичаена ситуација во која на младиот борец за време на мечот му испадна заштитната гума од устата. Неговиот противник забележа што се случило и, покажувајќи врвен ферплеј, не сакаше да го искористи моментот додека ривалот е практично незаштитен. Тој застана на неколку метри оддалеченост и трпеливо чекаше противникот да ја подигне гумата и да ја врати на место, со намера борбата да продолжи дури кога и двајцата ќе бидат целосно подготвени.

Меѓутоа, во тие моменти вниманието го привлече тренерот на борецот кој чекаше. Тој почна гласно да вика и агресивно да му наредува на својот пулен веднаш да го продолжи нападот, иако ривалот сè уште се обидуваше да ја намести заштитната гума. Настана кратка и тензична ситуација во која младиот борец најпрво се двоумеше, но на крајот сепак го послуша својот агол и тргна кон противникот.

Овој потег резултираше со момент кој засекогаш ќе ја одбележи кариерата на „напаѓачот“. Противникот успеа вешто да го избегне неспортскиот налет и реагира речиси инстинктивно, задавајќи разорен кружен удар со лакт кој директно го погоди ривалот и веднаш го испрати на подот. Салата експлодира од воодушевување по овој неочекуван епилог, претворајќи ја ситуацијата од очигледна беспомошност во спектакуларен пресврт за кој долго ќе се зборува.

Снимката од овој неверојатен нокаут веднаш го привлече вниманието на љубителите на боречките вештини ширум светот. Реакциите и осудите се насочени исклучиво кон непрофесионалниот потег на тренерот кој се обидел да изгради име преку грбот на сопствениот нокаутиран борец, покажувајќи огромно непочитување кон ривалот и кон самиот спорт.

„Тој тренер пропадна како човечко суштество. Немам сомнеж дека тој 'тренер' е сериозен идиот и дека мисли само на себе. Се надевам дека тој идиот знае дека ова е негова вина. Бескорисно ѓубре. Каде е почитта кон противникот?“, беа дел од жестоките коментари на револтираните фанови.