Керик: Знам што треба за успех на Манчестер јунајтед

13 јануари 2026 - 21:17

Мајкл Керик и официјално е нов тренер на Манчестер јунајтед, клупската легенда ја презема улогата на привремен менаџер до крајот на сезоната 2025/26, потврдија вечерва „црвените ѓаволи“.

Керик во дресот на Јунајтед одигра 464 натпревари и освои пет титули во Премиер лигата, ФА куп, два Лига купа, Лигата на шампионите, Лига Европа, како и Светското клупско првенство на ФИФА.

По завршувањето на играчката кариера во 2018 година, тој стана дел од стручниот штаб на првиот тим, работејќи со Жозе Мурињо и Оле Гунар Солшер. По заминувањето на Солшер, Керик ја водеше екипата како привремен тренер, а од клубот истакнуваат дека одлично ја завршил задачата.

Последен ангажман поранешниот англиски репрезентативец имаше во Мидлсброу, каде што беше тренер две и пол години, од октомври 2022 година до изминатиот јуни.

„Чест ми е што ја преземам одговорноста да го водам Манчестер јунајтед. Знам што е потребно за да се работи успешно тука и мојот фокус е да им помогнам на играчите да ги достигнат стандардите што се очекуваат во овој неверојатен клуб, стандарди за кои знаеме дека оваа група е повеќе од способна да ги исполни“, изјави Керик.