Чудо во Јужна Америка: Аргентина доби шампион за кого никој досега нема слушнато (ВИДЕО)

02 јуни 2025 - 10:44

Минатата ноќ во Аргентина се случи вистинско чудо, откако шампион првпат во 120-годишната историја стана тимот Платенсе, кој во финалето го совлада Хуракан со 1-0.

Одлучувачкиот момент на натпреварот се случи во 63. минута, кога Гвидо Маинеро со одличен волеј од свртување ја смести топката во мрежата и донесе огромна радост на навивачите на Платенсе. Малкумина имаат слушнато за овој клуб, освен најпосветените љубители на јужноамериканскиот фудбал. Но сега, Платенсе направи нешто што изгледаше незамисливо – ја освои титулата во Аргентина.

Нивниот пат до финалето на Апертурата беше неверојатен. Откако го завршија лигашкиот дел на шестото место во групата Б, во нокаут фазата редум ги елиминираа великаните – Расинг, Ривер Плејт, Сан Лоренцо, и на крај во финалето – Хуракан. Покрај првата титула шампион на Аргентина, која претставува и прв голем трофеј во клупските витрини, Платенсе следната сезона за првпат во историјата ќе настапи во групната фаза на Копа Либертадорес.

ФОТО: EPA PHOTO