Несторовски: Стар сум за трансфер - сакам да им помогнам на младите да се продадат

31 октомври 2025 - 13:35

Фудбалерите на Славен Белупо в недела ќе го дочекаат лидерот на табелата во хрватското првенство, екипата на Хајдук, во натпревар што ќе се игра во Копривница со почеток од 16 часот.

Сите билети за дуелот на стадионот „Иван Кушек-Апаш“ се распродадени, што ветува вистинска фудбалска атмосфера. Во пресрет на мечот, македонскиот напаѓач Илија Несторовски зборуваше за својата форма и за фактот не му е важно да постигнува голови, туку тимот да победува.

„Сакам да асистирам на помладите, да им помогнам да напредуваат и да се продадат. Јас веќе сум стар за трансфер – важно е тимот да победува, а сите да бидеме задоволни“, изјави Несторовски.

Искусниот Македонец се потсети и на моментите од 2016 година, кога како најдобар стрелец на лигата го напушти Интер Запрешиќ:

„Тогаш ниту еден хрватски клуб не ме сакаше. Можеби така и требаше да биде, бидејќи направив одлична кариера – играв во Серија А и на крајот повторно се вратив во ХНЛ“, дополни популарниот „Несто-гол“.

Несторовски по три сезони минати во Интер Запрешиќ и 69 постигнати гола во 90 настапи се пресели во калчолигашот Палермо, по што настапуваше уште за Удинезе и Асколи пред лани да потпише за Славен Белупо. За Македонија има 52 настапи и 10 постигнати погодоци.