Барди за мајсторскиот гол: Видов дека никој не е легнат, а намирисав дека ќе скокнат!

14 октомври 2022 - 12:45

Македонскиот репрезентативец, Енис Барди, синоќа го постигна третиот погодок во дресот на Трабзонспорт, а прв од слободен удар, откако беше стрелец во триумфот против Монако (4-0) во меч од 4. коло од Лига Европа.

Тој по средбата се обиде да објасни како решил да шутне по земја, под живиот ѕид на противникот, со што успеа да ги надмудри и противничките играчи и нивниот голман.

„Среќен сум што победивме и што дојдовме до трите бода. Задоволен сум што постигнав гол, но најважно е што тимот да победува. Изминатиот период имав проблеми со прекините и напорно работев да се подобрам во тој дел. Пред да го изведам слободниот удар видов дека нема никој легнат позади живиот ѕид, а знаев дека играчите во него ќе скокнат. Затоа реков дека ќе се обидам и на голема радост ја затресов мрежата“, изјави Барди.

Голот на Барди се најде во конкуренција за најдобар погодок на колото во Лига Европа.