Серијата на Барса во опасност - во Сан Себастијан без најдобриот играч

Каталонскиот клуб е безмалку два месеца без пораз, од 25 ноември кога загуби од Челси во Лигата на шампионите и како резултат на тоа изби на челната позиција на табелата, го освои Суперкупот и стигна до четвртфиналето од Копа дел Реј. Сепак, серијата денеска е во опасност бидејќи во Баскија екипата ќе замине без најдобриот играч во моментов Рафиња.

Пред неколку дена имаше информации дека Бразилецот играл повреден и во Суперкупот каде блескаше со четири гола на два меча, но очигледно болките се толку големи што не е во можност вечерва да им помогне на другарите. Рафиња има повреда на задната ложа и не отпатува за Сан Себастија, па Барселона без него ќе мора да бара продолжување на победничката серија и мошне важни бодови во борбата за шампионската титула.

Рафиња сезонава веќе пропушти девет натпревари бидејќи не играше во периодот од 28 септември до 9 ноември и во тој период Барселона оствари неколку лоши резултати, како поразите од ПСЖ во Лигата на шампионите и Севиља и Реал во Ла Лига. Победничката серија почна откако тој се врати во полна форма што доволно зборува колку е важен за екипата на Барселона.