Носител експресно вратен дома, Зверев лошо почна, ама се „спаси“ на стартот на АО!

18 јануари 2026 - 08:43

Првото поголемо изненадување на Австралијан опен дојде уште на самиот старт, откако 22. носителот Флавио Коболи експресно беше елиминиран и практично не мораше ни да го „распакува куферот“ во Мелбурн.

Италијанецот беше поразен од Британецот Артур Фери (6-7, 4-6, 1-6), за кого ова е голем момент во кариерата, бидејќи досега никогаш нема минато подалеку од второто коло на гренслем-турнир, повторувајќи го подвигот од ланскиот Вимблдон кога го елиминираше Алексеј Попирин (20. носител). Британецот одигра исклучително агресивно, со дури 20 винери, но на исходот влијаеше и здравствената состојба на Коболи. Италијанецот доби лекарска помош уште по третиот гем во првиот сет, зеде терапија поради болест и од тој момент очигледно не беше во можност да игра на своето препознатливо ниво. Фери, пак, ја продолжи импресивната серија – од почетокот на квалификациите нема загубено ниту еден сет и моментално има скор 9-0 на Австралијан опен.

Минатогодишниот финалист, пак, Александар Зверев имаше тежок старт на „Род Лејвер арената“, но на крајот рутински се пласираше понатаму. Германецот загуби прв сет од Габриел Дијало со 6-7, но потоа ја презеде контролата и ги доби следните три сета со 6-1, 6-4, 6-2, покажувајќи зошто е меѓу главните фаворити за пласман до самиот крај на собирот во Мелбурн.

ФОТО: EPA PHOTO