Левандовски: Доцна е да одам во Реал Мадрид – имам 31 година!

06 декември 2019 - 09:00

Полската суперѕвезда Роберт Левандовски во последните години неколкупати се поврзуваше со трансфер во најтрофејниот светски клуб Реал Мадрид, но до такви трансфери не дојде, иако во два наврати сериозно се шпекулираше дека ќе го облече белиот дрес на „Сантјаго Бернабеу“, посебно во сезоните 2017/18 и 2018/19.

Левандовски призна дека пред пет години кога од Борусија Дортмунд преминал во Баерн Минхен имал желба да игра во Шпанија, но...

„Пред пет-шест години тоа беше нешто што се чувствуваше во воздухот. Ама сега... Сега е доцна. Имам 31 година и доцна е за Реал Мадрид. Сега сум во Баерн, среќен сум, а ако видите во последната деценија каде е Баерн, ќе видите дека игра полуфинале, финале, четвртфинале во ЛШ, освоил пехар...Кога играте за еден од најголемите клбови на светот, тешко е да ја смените средината. Нормално, Реал три години по ред беше европски првак, но тешко се менува сега средината“, посочува Полјакот.

Моментно е број еден голгетер во Европа со 27 гола на 20 меча, од кои 16 му се во Бундеслигата и на добар пат е да го урне рекордот на Герд Милер од 40 гола во една сезона.