Фудбалерот-херој – се вратил во пожарот во Кран Монтана за да ја спаси девојката!

И покрај сериозните повреди, тој се наоѓа во постабилна состојба и покажува знаци на опоравување. Охрабрувачките информации ги потврди неговиот агент Кристоф Хито, кој откри дека фудбалерот првично успеал да излезе од запалениот објект, но кога сфатил дека неговата девојка е заробена внатре, без двоумење се вратил во огнената стихија. Трагедијата се случила во новогодишната ноќ, кога пожар предизвикан од огномет избувнал во подрумот на локалот и за кратко време се проширил. Според официјалните податоци, во катастрофата загинале 47 лица, а околу 150 биле повредени, меѓу нив и Дос Сантос, кој е првиот спортист официјално евидентиран меѓу настраданите.

„Тој не е само жртва, туку и вистински херој. Излезе од тој пекол, а потоа се врати за да ја спаси девојката“, истакна Хито, додавајќи дека младиот фудбалер има изгореници на околу 30 проценти од телото, но може да зборува, разбира и дише речиси нормално, без потреба од респиратор.

Тренерот на Мец, Стефан Ле Мињан, исто така испрати порака на поддршка.

„Веруваме дека сè ќе биде во ред и се надеваме дека ќе се врати на терените во наредните месеци. Тој е примерен играч и со право капитен на резервниот тим“, изјави Ле Мињан.

Младиот дефанзивец досега настапуваше за резервниот тим на Мец, каде ја носеше капитенската лента, а кон крајот на декември за првпат беше дел од клупата на првиот тим во натпревар од Купот на Франција. Неговиот херојски чин, сепак, далеку го надмина фудбалот и го направи симбол на храброст во една од најмрачните ноќи во швајцарското скијалиште.