Димитриевски пред сензационален транафер - во поранешен европски првак?! (ФОТО)

23 мај 2026 - 23:57

Македонскиот репрезентативен голман Столе Димитриевски се наоѓа пред сензационален трансфер, откако интерес за неговите услуги покажал францускиот гигант и поранешен европски шампион Олимпик Марсеј, што значи дека Валенсија ќе има сериозни конкуренти летово за потпис на Македонецот.

Димитриевски има договор со Валенсија до летово, а според шпанските медиуми клубот од „Месталја“ сака да ја активира клаузулата и да му ја продолжи соработката до 2028 година, а причината е тоа што македонскиот голман блесна во улогата на прв чувар на мрежата откако му беше дадена шанса.

Голманот на Македонија оваа сезона настапи на 24 меча во сите натпреварувања за Валенсија и имаше седум „чисти мрежи“, што е одличен податок, а со неговите одбрани помогна на тимот да се извлече од лоша ситуација и да заврши во горниот дел од табелата, односно на деветтото место во Ла Лига.

Македонецот, сепак, ќе има сериозни понуди ова лето и Валенсија ќе има проблеми да го задржи во клубот затоа што за него покажува интерес гигант како Олимпик Марсеј, но постои интерес и од неколку други екипи.

Димитриевски пред да пристигне во Валенсија бранеше и за Рајо Валјекано, Химнастик и Гранада во Шпанија, како и за Работнички во Македонија.

Фото: Facebook/Valencia C.F