Дербито со Челси донесе главоболки за Пеп: Работите не изгледаат добро...

05 јануари 2026 - 07:40

Манчестер сити по дуелот со Челси би можел да се соочи и со проблеми, тренерот Пеп Гвардиола по средбата призна дека повредата на Јошко Гвардиол воопшто не изгледа наивно, а дополнителна грижа претставува и Рубен Дијаз.

Хрватскиот дефанзивец беше принуден да го напушти теренот во второто полувреме а Гвардиола по дуелот не ја криеше загриженоста.

„По прегледите ќе знаеме повеќе, но не изгледа добро, ниту за него ниту за Рубен. Ќе видиме што точно се случило“, изјави Гвардиола.

На дополнително прашање за состојбата на португалскиот стопер, шпанскиот стратег потврди дека и Дијаз почувствувал проблем во текот на второто полувреме.

„Да, изгледа дека и тој е повреден. Сè уште не сум разговарал со лекарите, но ако Рубен мораше да излезе, значи дека почувствувал нешто“, додаде Гвардиола.

Засега не е познато дали станува збор за удар или мускулна повреда, а повеќе информации се очекуваат во текот на денешниот ден. Потенцијалното подолго отсуство на Гвардиол и Дијаз би било сериозен удар за Манчестер сити, кој води битка со Арсенал за самиот врв во Премиер лигата.