Ако пропаднат преговорите со Фабрегас, Интер има уште две алтернативи

04 јуни 2025 - 09:45

Интер веќе ја почна потрагата по наследник на Симоне Инзаги и ќе мора итно да го реши ова прашање бидејќи Светското клупско првенство во САД е многу блиску.

Инзаги си замина откако договори богат договор со Ал Хилал. Некои сметаат дека овој потег бил комбинација од настани уште пред Минхен, но Интер сега мора брзо да реагира. „Нераѕурите“ веќе почнаа преговори со Фабрегас и веќе го информираа Комо за своите намери. Реално има големи шанси легендарниот Шпанец да седне на клупата на Интер, особено затоа што другата опција, Роберто де Зерби, веќе објави дека ќе остане во Марсеј.

Фабрегас има само две години искуство како тренер, но веќе оствари одлични резултати со Комо, негувајќи привлечен и симпатичен фудбал. Ако прифати, ќе мора да го подмлади стариот тим и да започне нов циклус.

Во случај преговорите со Шпанецот да не доведат до позитивен исход, што е малку веројатно, постојат уште две опции за тренерската позиција на Сан Сиро. Станува збор за двајца поранешни играчи на Интер, Патрик Виеира од Џенова и Кристијан Киву од Парма.