Влатко Стојановски по три години се враќа во Македонија – ја засили Шкендија

22 јуни 2022 - 18:29

Поранешниот македонски репрезентативец Влатко Стојановски и официјално е нов член на екс-македонскиот првак Шкендија, откако денеска ги мина лекарските прегледи и веќе позираше во опрема на тетовци.

Стојановски после три години се враќа во македонскиот фудбал откако во летото 2019 година од Ренова за 1,5 милиони евра беше продаден во француски Ним, а по една година мината и во Шамбли, лани се пресели во хрватска Горица и сега се враќа во Првата лига како големо засилување на бившиот шампион.

Стојановски во 2019 година беше најдобар стрелец во Првата лига, а на 16 ноември 2019 година дебитираше за македонската репрезентација за која има девет настапи и два гола. Стојановски е центарфор кој го засилува нападот на тетовци и е трето летно засилување откако во таборот на црвено-црните пристигнаа и Башким Велија и голманот Давор Талески.

Делчевчанецот е поранешен фудбалер на Металург, а играше уште и за Сплит, Неретванац и Дугопоље во Хрватска, пред да дојде во Ренова во 2018 година и во таа сезона 2018/19 со 19 погодици беше „златна копачка“ во Првата лига.