Шкендија ќе игра пред празни трибини до крајот на сезоната!

05 април 2025 - 13:58

Дисциплинската комисија на Фудбалската федерација на Македонија донесе одлука за скандалозното однесување на навивачите на Шкендија во натпреварот против Брера кога не беше испочитувана минутата молк во чест на жрвтите во трагедијата во Кочани.

Шкендија ќе мора во следните пет домашни натпревари да игра без публика, а тоа значи дека и до крајот на актуелната сезона во Тетово нема да има публика.

Исто така тетовскиот клуб ќе мора да плати и парична казна во износ од 5.000 евра поради лоша организација.

Делегатот на натпреварот Гоце Шопоски доби суспензија од шест месеци за извршување било каква функција во фудбалот.

Шкендија доби и автоматска казна во паричен износ од 1.000 евра поради спречување на официјален снимател да ја извршува својата работа.