Првата лига повторно на ТВ и тоа на – Арена Спорт и МТВ!

ФФМ со Арена Спорт потпишале двегодишен договор, според многу најави вреден по 150.000 евра од сезона, а парите од овие ТВ-права сега ќе бидат искористени за да се намалат трошоците за котизација, кои клубовите ги плаќаа досега, па практично целата сума би требала сега да биде покриена, а со тоа клубовите одлободени од таков трошок. Ова е првпат во историјата мечеви од домашниот шампионат да се пренесуваат на регионален спортски канал.

ФФМ објави дека првиот човек Муамед Сејдини минатата недела имал состаноци со Арена Спорт и на крајот било договорено регионалната телевизија да дава по два преноси од секое коло, во сабота и во недела, ќе ги има ексклузивните права од Купот на Македонија и ќе има ексклузивно право за мечевите секаде каде што се емитува оваа спортска телевизија.

Во проектот со ТВ-правата за Првата лига влегува и националниот сервис, кој ќе емитува два меча од колото, во саботите и во неделите и ќе ја покрива територијата на Македонија со преноси и коментар на македонски јазик.

„По успешните преговори, задоволство е да објавиме дека постигнавме договор околу телевизиските права за натпреварите од Првата лига. Добивме понуда и правата ги отстапуваме на Арена Спорт. Со ова праќаме широка порака. Ова е порака дека фудбалот го враќаме на телевизија низ директни преноси, свесни за важноста на нашата соработка со Арена Спорт како водечки регионален спортски канал и МТВ како национален сервис. Од друга страна, ова е голема можност и за клубовите, не само поради тоа што сега се ослободени од плаќање котизација за настап во домашниот шампионат, туку многу повеќе, заради вниманието кое ќе го добијат и можноста за своја промоција во секоја смисла. Со емитувањето на регионален канал се зголемува и одговорноста кај нив, но и кај судиите и сите други чинители. Наша задача е да го чуваме имиџот и вредностите на нашиот фубал и да работиме да биде уште поуспешен и попопулареен. ФФМ останува сервис на клубовите за подобрување на имиџот и што е можно подобра презентација на домашната лига. Само заеднички можеме да му покажеме на регионот дека и во нашата држава има силни екипи, добри фудбалери и квалитетен фудбал“, рече претседателот на ФФМ, Муамед Сејдини.