Тренерот кој освојуваше титули со Надал станува дел од тимот на Синер!

20 мај 2025 - 17:36

Легендарниот шпански тениски стратег Карлос Моја ќе биде нов член на стручниот штаб на италијанскиот тенисер Јаник Синер, пренесуваат шпанските медиуми.

Моја ќе му се приклучи на Синер во текот на 2026 година, откако актуелниот тренер Дарен Кејхил и Италијанецот ќе ја завршат соработката по крајот на оваа сезона.

Претходно, се најавуваше дека поранешниот тренер на Синер Рикардо Пјати, му препорачал повеќе имиња, а меѓу нив биле: Ренко Фурлан, Борис Бекер, Иван Љубичиќ и  Карлос Моја, кој сега најверојатно ќе биде дел од тимот на Италијанецот.

Моја зад себе има богато искуство и огромен успех како тренер, од 2016 до 2024 година беше дел од тимот на Рафаел Надал, со кого освои бројни титули, вклучително и Гренд слемови. Откако Надал ја заврши својата професионална кариера годинава, Моја остана без ангажман.

Инаку, Моја кој има 48 години е поранешен победник на Ролан Гарос, а ќе остане запаметен и како првиот Шпанец кој се искачил на врвот на АТП листата во 1999 година.

Фото: Jannik Sinner/FB