Ледецки го достигна легендарниот Фелпс – 15-ти златен медал на СП во пливање

25 јули 2023 - 14:42

Американската пливачка Кејти Ледецки денеска испиша историја со победата на 1.500 метри слободно на Светското првенство во пливање, зашто со ова го достигна легендарниот Мајкл Фелпс и сега овие двајца имаат по 15 златни одличја од светските пливачки шампионати.

Ледецки исплива трето најбрзо време во историјата на делницата од 1.500 метри, со 15:26,27 минути и само светскиот рекорд кој го држи од 2018 година и најдоброто време на светските шампионати од 2015 година, исто така во нејзина сопственост, се подобри времиња од ова на СП во Фукуока.

„Среќна сум како заврши, сѐ е ова плод на напорна работа и на извонредни луѓе околу мене. Добро се чувствувам“, рече Ледецки.

Таа има 15 индивидуални злата од светските првенства колку и Фелпс, а е прва пливачка која севкупно има 20 златни медали на светските шампионати.