Безбедноста на пливачите пред сѐ: Невреме го прекина Охридскиот маратон!

30 август 2025 - 16:18

Охридскиот пливачки маратон во своето 38. издание денеска не успеа да биде завршен до крај, откако силното невреме го натера организаторот да ја прекине трката.

По повеќе од половина испливано од вкупната 25-километарската делница, пливачите се соочија со високи бранови и силен ветер, поради што продолжувањето на маратонот стана небезбедно. Организаторите донесоа одлука да го прекинат натпреварот и да ја стават безбедноста на пливачите пред сè.

Трката започна утринава кај манастирот Свети Наум, со вкупно 16 пливачи – десетмина во машка и шестмина во женска конкуренција. Натпреварувачите пристигнаа од шест различни држави.