Официјално: Гарначо седум години во дресот на Челси

30 август 2025 - 21:14

Аргентинскиот репрезентативец Алехандро Гарначо од денеска официјално е играч на Челси откако потпиша седумгодишен договор со лондонскиот клуб.

На Стемфорд Бриџ се сели од Манчестер Јунајтед каде последните десетина месеци се најде во немилост на менаџерот Рубен Аморим и неколку пати јавно го истакна своето незадоволство. Во дресот на Јунајтед одигра 93 натпревари во Премиер лигата и постигна 16 гола, а според многумина е еден од најголемите таленти во англиското првенство во моментов.

„Ова е прекрасен момент за мене и моето семејство бидејќи доаѓам во голем клуб. Го гледав Челси на Светското клупско првенство и со нетрпение чекам да заиграм за најдобриот клуб на планетата“, изјави Гарначо на промоцијата.

Оваа сезона со Челси тој ќе настапува во Лигата на шампионите, за разлика од Манчестер Јунајтед кој не обезбеди пласман во ниедно од натпреварувањата на УЕФА.