Чуден меч на „Бернабе“: Реал даде пет гола, а едвај ја победи Мајорка (ВИДЕО)

„Кралевите“ стравуваа за својата победа до последниот свиреж на главниот судија и покрај тоа што дури пет пати ја тресеа противничката мрежа. Три од петте постигнати гола беа поништени, два на Мбапе поради офсајд и еден на Арда Ѓулер поради игра со рака.

Ведат Муриќи ги смрзна домашните навивачи во 18. минута кога го отвори резултатот, но благодарение на еден блицкриг, во 37. и 38. минута, Реал ги сврте работите во своја корист. Арда Ѓулер израмни, а потоа Винисиус се погрижи пресвртот да биде комплетен за нови три бода, вкупно девет на Реал.

Во 66. минута Мајорка имаше голема шанса да израмни, Саму Коста со прекрасен удар го совлада Куртоа, но од гол-линијата топката ја извади Карерас и спаси сигурен погодок. Мајорка по три кола има само еден освоен бод, но мора да се има предвид дека во досегашниот дел од првенството играше против најголемите кандидати за титулата Барселона и Реал.