Пелистер пак го преслуша Вардар и освои уште еден трофеј во „Јане Сандански“ (ФОТО)

30 август 2025 - 22:58

Откако во јуни триумфираше во „Јане Сандански“ во последното коло од домашниот плејоф и ја освои шампионската титула, Пелистер вечерва дојде до уште еден пехар на истото место.

Битолскиот клуб е освојувач на првото издание на Регионалниот ракометен турнир чие премиерно издание се одржа во Скопје, а на кое покрај најдобрите две македонски екипи, учествуваа и Војводина од Србија и Ловќен од Црна Гора. Во денешниот последен меч, Пелистер го победи Вардар со 25-23 и со три победи од три натпревар стигна до титулата во регионалното натпреварување.

Турнирот се играше во „Борис Трајковски“, но поради денешниот пожар во близина на арената, мечот меѓу македонските гиганти беше преместен во „Јане Сандански“. И покрај тоа, Пелистер доминираше во текот на целиот натпревар, водеше и со пет разлика која за Вардар се покажа недостижна.

Ова е втор триумф на Пелистер против Вардар за време на подготовките откако минатата недела го совлада и на турнирот „Крсте Андоновски“ во Охрид, а двете екипи в среда ја отвораат сезоната со мечот од Суперкупот на Македонија, во Кавадарци.

Во женска конкуренција, трофејот го освои црногорскиот претставник Будуќност, а учествуваа уште македонските екипи Ѓорче Петров и Металург, како и Бор од Србија.