Мрежата на Силекс остана незатресена, Струга пукна „петарда“ во Куманово

Попладнево двата тима гостуваа, но остварија триумфи без примен гол, задржувајќи ги со тоа челниците две позиции на табелата. Силекс славеше против Арсими со 1-0, а Струга го совлада повратникот во елитата Башкими со 5-0.

Стрелец на единствениот гол за Силекс беше Мирчевски уште во 17. минута. Арсими се обиде подоцна да дојде до третиот бод или евентуално до првата победа во првенството, но безуспешно. И по четири кола Силекс е единствен тим без примен гол во Првата лига, со гол-разлиа 12-0.

Струга има примен гол, но денеска го совлада Башкими во Куманово со 5-0. Од исклучително големо значење беше црвениот картон на Марко Симоновски во 23. минута бидејќи веќе во следната акција Компаоре ја донесе Струга во водство од 1-0. До полувреме Радески го зголеми водството на гостинскиот тим, а во вториот дел повторно Компаоре, па потоа Шабани и Малески ја комплетираа „петардата“ во голот на домашниот тим.