Морници да ве полазат: Партизан игра во чест на Манце и постигна ист гол како неговиот (ВИДЕО)

30 август 2025 - 22:05

В среда се навршуваат четири децении од загинувањето на еден од најмаркантните напаѓачи во историјата на Партизан, Драган Манце, па белградскиот клуб одлучи на денешниот меч со Радник уште еднаш да му оддаде почит.

Манце загина на 3 септември 1985 година во сообраќајна несреќа кај Земун и остави голема болка во срцата на сите навивачи на Партизан кои и по толку долго време не можат да го прежалат. Во негова чест, „црно-белите“ денеска играа во дресови со ист дизајн како од „неговото“ време и го победија Радник со 2-0.

Она што ќе остане забележано од мечот со Радник е голот што го постигна Костиќ, а кој неодоливо потсетува на еден од погодоците на Манце во дресот на Партизан, постигнат против Динамо Загреб на ЈНА. Акција по левата страна, центаршут на 7-8 метри од голот и гол со глава. Да биде спектаклот поголем, Костиќ, кој исто како славниот голгетер го носи бројот 9 на својот грб, прослави во стилот на Манце, со лизгање на колена и кренати раце, колку да предизвика морници, па и солзи кај сите фанови на Партизан.