Турците загубија уште една причина да ѝ помогнат на Македонија!
Причина за тоа е не толку убедливата победа на Русија против Словенија, во дуелот на двете најдобри селекции во нашата група Ц. Русите победија со 3-0 и ја оставија Словенија на втората позиција, меѓутоа разликата во поени по сетови не беше спектакуларно висока, за да може да го оштетат контото на Словенците и со тоа да им ги доближат на Турците.
Словенците загубија со 21-25, 21-25, 21-25, што ќе рече на досегашниот биланс на освоени и примени поени во групата, кој изнесуваше 356-301 минусираа само 12 поени. Турците со победа од 3-0 над Финска вечерва би дошле до идентични три победи, 9 бода и скор 10-7 во сетови, како и Словенците, па за да падне одлука кој ќе биде второ место ќе се активира правилото за подобар поен-количник, а Турција таму е драстично послаба од Словенија.
Во мечот со Финска таа ќе влезе со 308 освоени и 325 примени поени, така што им требаше многу поголема негатива на Словенците, за и тие да се надеваат на некаков логичен висок триумф над Финска. Вака, дури и да ги освојат сите три сета со по 25-5 (што е апсурдно), повторно не би можеле до второ место.
Сето ова го образложуваме затоа што, потсетуваме, на Македонија потребна ѝ е победа на Турција за да опстане на Европското првенство и да продолжи во осминафинале. Но, во ситуацијава, Турците немаат многу мотиви да играат со Финска, па и со пораз од 2-3 ќе останат таму каде што се, на третата позиција.
Сега веќе е сигурно дека Русија е прва во групата со максимален ефект, Словенија е втора, а Турција со една рака ја има третата.