Историски исчекор: Пет македонски одбојкарски екипи ќе играат во Европа!

19 јуни 2025 - 11:40

Македонската одбојка ќе запише историски момент следната сезона, откако првпат дури пет екипи ќе се натпреваруваат на европските натпреварувања.

Четири од нив веќе го обезбедија европскиот билет, а петтиот чека потврда од ЦЕВ. Шампионите во машка односно женска конкуренција, Струмица 47&72 и Јанта Волеј КВ, ќе ја претставуваат Македонија во најсилното европско натпреварување – Лигата на шампионите. Штип УГД и Наковски Волеј, кои се куп-освојувачи кај мажите и жените, ќе се борат во Челинџ купот, додека Работнички Скопје, финалист во женскиот плеј-оф, аплицираше за „вајлд-карта“ за истото натпреварување и чека одлука од ЦЕВ.

Особено значајно е што за три клуба – Штип УГД, Јанта Волеј КВ и Наковски Волеј – ова ќе биде нивно прво учество во европските купови, што ја прави оваа сезона уште повпечатлива за македонската клупска одбојка.

Ждрепката за новата сезона во Лигата на шампионите, ЦЕВ купот и Челинџ купот ќе се одржи на 15 јули, во седиштето на Европската одбојкарска конфедерација (ЦЕВ) во Луксембург.