Победа над Ј. Кореја за крај, Македонија го освои 27. место на СП!

И ова не излезе лесна задача, како што информира и резултатот, иако не личеше така добри 20-тина минути, па и нешто повеќе. Македонија наметна стил, одигра солидна одбрана и главно од контри почна да гради предност од почетокот на средбата. Кога поведовме со 8-4 во деветтата минута, тоа беше повод за прв тајм-аут за Роландо Коста де Фреиташ, португалскиот селектор на Корејците.

Ни тоа не помогна да се смени насоката на мечот и Македонија продолжи кон највисоката предност од шест разлика, која последно ја држеше некаде во 25. минута, со 17-11. Но, тука почнаа проблемите. Кореја излезе со одбанбена зона 3-3 и Македонија наеднаш остана без одговори во нападот. Направија серија од 6-1 и се изборија мечот повторно да стане неизвесен, со 20-19 за Македонија на паузата.

Второто полувреме почна во знакот на корејскиот голман Парк, кој запиша седум интервенции во првите 10 минути, од кои два на пенал. И покрај тоа ја држевме позитивата, но не за долго. Свесно или не, веќе прифативме бркотница по теренот, која многу повеќе ѝ одговараше на Кореја. Брзите бекови или влегуваа или организираа напад за пивот, па Корејците првпат поведоа, со 26-25.

Неизвесноста траеше некаде до 52. минута, кога средниот бек Канг доби црвен картон. Тоа очигледно ги разниша Корејците, правеа се повеќе грешки во нападот, па Македонија успеа да се одлепи и покрај пресинг одбраната до крајот. Дејан Манасков, Гоце Георгиевски и Жарко Пешевски го поминаа мечот на клупа, а кратко во вториот дел влезе Никола Митревски. Мартин Томовски заврши со 14 одбрани, а меѓу стрелците се истакнаа Филип Кузмановски со осум и Ненад Костески со шест гола.

Со четири порази и три победи, Македонија го освои 27. место на СП 2023.