„Нема поубаво чувство од тоа кога гледате дека цела нација е горда на нас!“

24 јануари 2025 - 17:20

Македонија покажа дека има квалитет да се натпреварува со најдобрите на ракометното Светско првенство, но пред репрезентативците е уште еден голем предизвик, а тоа е утрешниот дуел против Франција.

Ненад Костески кажа дека на Мундијалот покажале дека ова е една поинаква Македонија, која досега има добар успех.

„Ни преостанува уште овој меч против Франција, знаеме со каков квалитет располагаат. Се подготвуваме и ги анализираме, ќе го дадеме нашиот максимум како последен меч од втората фаза. Сакаме да потврдиме дека на ова Светско првенство покажавме една поинаква Македонија со добар успех за сите нас. Добредојдена е секоја поддршка, нема поубаво чувство кога гледаме дека цела нација е горда на нас, а со тоа сме и ние сите среќни и задоволни. Тоа ни дава повеќе енергија за секој следен натпревар, за да се покажеме во уште подобро светло“, вели Костески.

Репрезентативецот вели дека во мечот против Франција влегуваат без притисок и ќе се обидат да го изненадат противникот.

„Играме против селекција која според мене ќе стигне до финале на ова првенство. Играме против мега-ѕвезди, ни останува да уживаме во овој натпревар, влегуваме без притисок и се надевам дека ќе прикажеме добра игра. Ќе се обидеме да ги изненадиме Французите“, кажа македонскиот ракометар.

Натпреварот меѓу Македонија и Франција е закажан утре од 20.30 часот.