Митев: Данските судии не ни дозволија фер борба против Холандија!

17 јануари 2025 - 20:08

Репрезентацијата на Македонија вечерва загуби од Холандија (32-37) во контроверзен меч во кој во главна улога беа судиите, кои досудија дури 12 пенали за „лалињата“, а нам ни исклучија двајца ракометари.

Разочарувањето кај жолто-црвените беше огромно, а голем дел од избраниците на селекторот Кирил Лазаров беа револтирани од начинот на кој данските судии ја делеа (не)правдата.

„Во прво полувреме требаше подобро да им ја запреме транзицијата. Пробавме да се вратиме, но Данците не ни го дозволија тоа. Не сум видел ни на клупски ни на репрезентативен меч, некој тим да изведе 12 седмерци“, рече Митев.

Македонските ракометари сега имаат еден бод по првите две средби, а пред нив е уште една средба од првата фаза на СП и тоа против аутсајдерот Гвинеја, закажана за задутре (недела) од 18 часот исто така во Вараждин.