Миркуловски е нов координатор на машките селекции: Можам многу да помогнам!

10 јули 2025 - 10:22

Филип Миркуловски се врати во македонскиот ракомет, ја доби функцијата спортски координатор на машките ракометни селекции, тој верува дека може да ја извршува функцијата на високо ниво и да даде сериозен допринос за репрезентациите на Македонија.

Миркуловски по престојот во Германија реши да се врати во Македонија. Тој доаѓа на функцијата координатор на машките репрезентации, на местото од Влатко Тасевски кој сега е на позицијата генерален секретар.

Денеска се случи и официјалната презентација на Миркуловски на која искажа благодарност за довербата и верба дека може многу да помогне.

„Благодарен сум му на претседателот на РФМ што ми овозможи да бидам на оваа значајна функција за македонскиот ракомет. Како и секогаш јас сум тука да дадам се од себе од моето знаење кое го стекнав во изминатите години во Германија. Моја примарна цел ќе биде развојот на младинските категории, тука сум и да ги искоординирам сите селектори, на сите категории, мора да ја подобриме таа комуникација на селекторите. Да изградиме единствен ситем на работа што ќе биде полесно за А селекцијата. Има многу работа, мислам дека можам многу да придонесам“, рече Филип Миркуловски.