Кузмановски: Зад нас е успешно првенство, но има и во што да се подобриме!

25 јануари 2025 - 22:20

Македонските репрезентативци и покрај вечерашниот пораз од Франција (25-32) задоволни ја напуштија „Арена Вараждин“, со оглед што остварија резултат со кој ја сочуваа четвртата позиција на табелата во втората група, што на крајот им го донесе 15-тото место на Мундијалот.

Филип Кузмановски и вечерва беше вистински лидер и со осум голови најефикасен во жолто-црвениот табор.

„За мене и пред првенството фаворит за златото беше Франција бидејќи има многу ѕвезди во екипата. Беше тешко да се игра против нив, но ние собравме сили и бевме мотивирани. Мислам дека зад нас имаме успешно првенство, но и дека има простор за напредок во иднина. Горд сум на овие момци, кои се бореа од прв до последен ден. Беа пожртвувани и дадоа сè од себе за Македонија. Имаше голем број навивачи во првите натпревари, одигравме максимално добро што можевме. Треба да сме задоволни“, изјави Кузмановски.