Овој Вардар е способен за чуда: „Веспрем арена“ замолкна од витезите на Парондо! (ФОТО)

Ако некој досега се прашуваше дали овој Вардар може да ја чува тежината на големото име, сега веќе нема дилеми, бидејќи на еден од најжешките терени во Европа, Роберто Парондо и неговите избраници славеа голема победа. Ниту ѕвездите на Веспрем не можеа да ја засенат тимската сила на Вардар, воспоставена уште од времето на Раул Гонзалес, а сега велемајсторски негувана од неговиот наследник и сонародник.

Таа дојде до израз првпат по дваесетина минути во првото полувреме, кога со серија од 4-0 Вардар првпат се одлепи на неверојатни плус пет, 11-6. Дејан Милосављев беше најистакнат во овој налет со неколку одбранети зицери, меѓутоа наскоро стигна одговор од спротивната страна, од Арпад Штербик. Голманксата институција пред мрежата на Веспрем фати две контри на Вардар, им овозможи на колегите да ја стопат негативата, но не и да ја престигнат, па на паузата вежеше 13-11 за Вардар.

Во второто полувреме дојде неминовното враќање на Веспрем, кој ја возврати серијата од 4-0 од првиот дел и по седум минути поведе со 16-14. Сепак, Вардар не се изгуби и не го фати паника, туку продолжи машки да се носи со Унгарците. И двете екипи неколку пати се менуваа во водството, се додека Вардар не врза три гола по ред во завршните три минути. Мирен реализатор беше Рожерио Мораес, кој само 5-6 минути порани го напушти теренот кривејќи, носен на рамо од соиграчите. Стисна заби, ја занемари повредата на коленото и се врати кога најмногу требаше за трета победа на Вардар по три кола во ЛШ.

Тој заврши со три гола, а најефикасен беше Дибиров со шест, покрај Борозан со пет и Чупиќ и Криштопанс со по четири. Милосављев беше фантастичен со 12 одбрани, добивајќи го дуелот со Штербик, кој остана на девет.