Охрид ќе бара од ЕХФ да ја исправи грешката на РФМ!
Охрид ќе бара од европската куќа на ракометот да игра во квалификациите од новоформираната Европска лига, во сезоната 2020/21. Клубот од „Билјанини извори“ очекуваше дека ќе добие ваква шанса по редовен пат, преку македонската Суперлига, меѓутоа РФМ реши да ја поништи сезоната, а распределбата на европските визи да ја направи според пласманот од минатата сезона.
Тогаш Охрид не беше во европска зона и затоа извиси, без разлика што во прекинатата сезона 2019/20 одигра извонредно, заостанувајќи само еден бод зад првопласираниот Металург и, на пример, шест повеќе од Бутел, на грб на ланската сезона повторно доби место во Европа, а сезонава беше четврти.
Раководството на Охрид мораше да се „преброи и пресмета“ пред да донесе одлука да се обрати до ЕХФ, бидејќи по одлуката на РФМ за распределба на местата во Европа, разочаран се откажа првиот спонзор, компанијата „Галеб“. И покрај тоа, Охрид сочува голем број од ракометарите кои играа и минатата сезона, а на клупата останува и тренерот Раде Стојановиќ.
Од македонските екипи веќе сигурно место во Европа имаат Вардар (Лига на шампионите), Еурофарм Пелистер, Металург и Бутел. Е. Пелистер, сепак, ќе чека дали ЕХФ ќе му додели вајлд-карта за ЛШ или ќе игра во новата Европска лига.