Металург загуби во Лисабон - имаше сила едвај за едно полувреме

15 септември 2018 - 21:01

Македонскиот вицепрвак Металург со убедлив пораз тргна во новата сезона во послабата конкуренција во Лигата на шампионите, откако денеска загубија во Лисабон од Спортинг со 34-26, иако на полувреме младите и десеткувани металурзи имаа егал меч против португалскиот тим.

Металург дури и водеше во најголемиот дел од првиот дел, имаше и предност до два гола, но откако на паузата се замина со нерешен резултат 13-13, во вториот дел Спортинг заигра далеку подобро и ги искористи сите проблеми на Металург за да си ја запише воведната победа. Со серија 4-0 на стартот на вториот дел, Португалците исчекорија кон победата, а разликата постојано ја одржуваа на оваа дистанца се до завршните десет минути од мечот, кога од 27-23 за Спортинг до крајот со нова серија од четири гола 7-3 стигнаа до убедлив триумф со осум погодоци (34-26)

Металург во Лисабон дојде крајно десеткуван, без Филип Кузмановски, кој си замина од Автокоманда, како и без двајца повредени првотимци Велковски и Јагуриновски, па практично Данило Брестовац немаше многу опции за да се бори за подобар резултат. На крајот Марио Танковски со шест гола од шест обиди беше најдобар, а претивок беше Халил Јагањац со само два гола од три шута. Руесга и Роча со по шест гола беа предводници на Спортинг