ЕХФ конечно пресече: Алкалоид и официјално е победник во Европскиот куп!

05 јуни 2025 - 10:09

Македонија и официјално го доби и третиот ракометен освојувач на европски трофеј (по Кометал ЃП и Вардар), откако Европската ракометна федерација (ЕХФ) денеска ја донесе долго очекуваната одлука за промоција на Алкалоид во победник на Европскиот куп оваа сезона по скандалот со АЕК во реванш-финалната средба во која грчкиот противник не сакаше да се појави на паркетот.

Неодиграниот натпревар е регистриран со службени 10-0 во корист на македонскиот тим, а одлуката уследи по тоа што грчкиот тим одби да ја игра средбата закажана за 25 мај во „Борис Трајковски“ поради притисок од нивните навивачи. Судот на ЕХФ оцени дека АЕК бил должен да учествува на натпреварот, а со одбивањето да настапи, клубот ги прекршил правилниците на федерацијата. Затоа, тој е прогласен за одговорен.

„Имајќи предвид дека македонскиот тим победи и на првиот натпревар со 29-25, тој го освојува трофејот и ги добива сите поврзани привилегии и права“, се вели во одлуката на ЕХФ.

Од европската Куќа на ракометот нагласуваат дека евентуална жалба од страна на АЕК нема да го суспендира спроведувањето на одлуката. Воедно, дисциплинската постапка за одбивањето да се игра, за евентуалната штета и начинот на продажба на билетите сè уште е во тек.

АЕК има рок од седум дена да поднесе жалба до ЕХФ Судот за жалби.