Тиквеш го помачи Пелистер, но шампионот не дозволи изненадување

16 октомври 2025 - 19:22

Ракометарите на Пелистер по вчерашниот пораз од Барселона во Лигата на шампионите денеска продолжија со обврските во Суперлигата каде што славеа победа на гости кај Тиквеш со 30-25.

Домаќините поведоа само на стартот со 1-0, а потоа гостите од Битола ја преземаа контролата над резултатот. Веќе до средина од првиот дел стигнаа до високи седум голови разлика (5-12). Сепак, Тиквеш не се откажуваше и се обидуваше колку што може да парира, па до крајот на првиот дел намали на 12-15.

Успеа Тиквеш во второто полувреме да дојде и израмнување (18-18), но шампионот тука одново „додаде гас“ и до крајот повторно беше подобриот тим за петти триумф од стартот на сезоната во која имаат уште еден пораз (Вардар) и едно реми (Алкалоид).

Мохамед Ахмед од Тиквеш беше најефикасен со осум гола, додека кај Пелистер по пет постигнаа браќата Атанасијевиќ, Тајник и Хакбарт.