„Се шокирав кога голем клуб како Вардар посака да ангажира тинејџер како мене!“

Ваквата понуда била изненадувачка дури и за поранешниот младински репрезентативец на Португалија, кој минатата сезона ја одигра за Виторија Сетубал и тоа како позајмен играч од Спортинг Лисабон.

„Барав проект кој ќе ми дозволи да бидам професионалец и во кој ќе имам шанса да напредувам. Имав понуди од Шпанија, но се појави Вардар и по анализите не можев да го одбијам. Како тинејџер, бев изненаден што голем клуб како Вардар со традиција и историја ме побара, но на спротивната страна, сакам кога се случуваат вакви работи затоа што ми даваат мотив и желба секојдневно да се докажувам и да напредувам“, изјави Мело за португалските медиуми.

Вардар досега како нови засилувања ги потврди бекот Стефан Петриќ од Партизан и крилото Марко Срдановиќ од Металопластика. Најтрофејниот клуб сезоната ја заврши на третото место во македонскиот шампионат и ако добие зелено светло од Европската ракометна федерација (ЕХФ) ќе игра во квалификациите за Европската лига.