Пожар го (пре)сели регионалното дерби меѓу Вардар и Пелистер во „Јане Сандански“!

30 август 2025 - 17:09

Последните средби од првото издание на Регионалната ракометна лига, во која изминативе денови учествуваа екипи од Македонија, Србија и Црна Гора, ќе се одиграат во салата „Јане Сандански“ наместо во „Борис Трајковски“ и тоа поради пожар во близина на овој спортски објект во скопската населба Карпош.

Ова значи дека вечната пресметка помеѓу Вардар и Пелистер (21 часот) принудно ќе се игра на домашниот терен на црвено-црните, што дефинитивно би било предност за четата предводена од Иван Чупиќ. Македонската пресметка воедно ќе биде и битка за првата позиција на регионалната табела, каде што на крајот три екипи би можеле да завршат со ист број бодови, па пласманот ќе го решава гол-разликата. Претходно, силите ќе ги одмерат Војводина и Ловќен.

По првите две кола, Пелистер има исто толку победи, Вардар и Војводина имаат победа и пораз, а Ловќен е последен без ниту еден бод.