Охрид се засили со српски бек кој минатата сезона играше за Вардар!

13 октомври 2025 - 12:19

Ракометниот клуб Охрид го официјализираше ангажманот на српскиот среден бек Александар Крсманчиќ, кој ќе биде дел од „гладијаторите“ најмалку во следните осум месеци.

Тој има 33 години и е висок 184 сантиметри и зад себе има богато интернационално искуство. Минатата сезона настапуваше за Вардар, каде што прикажа одлични партии, а претходно играше за унгарскиот Чургу, шпанската Анаитасуна, како и за српските клубови Југовиќ, Слога и Железничар.

Искусниот среден бек зад себе има настапи за сите младински селекции на Србија, како и за сениорскиот национален тим.

„Драго ми е што станав дел од Охрид во моментот кога амбициите на клубот растат. Многу ми се допаѓа визијата на клубот и ќе дадам сè од себе да ја оправдам довербата која ми е укажана. Се надевам дека во наредниот период Охрид ќе испише историски успеси и во домашното првенство и на европската сцена за радост на нашите навивачи,“ изјави Крсманчиќ по потпишувањето на договорот.

Со овој трансфер, охриѓани дополнително го зајакнуваат ростерот во пресрет на предизвиците во домашното првенство и настапите во Европа, каде што на стартот од Европскиот куп преубедливо го елиминираа азербејџанскиот тим Баки со 44-11 и со 38-21.