Борозан шоу за триумф на Вардар над Алкалоид!

Црвено-црните во голем стил тргнаа во плејофот, Алкалоид не можеше да најде решение за Вуко Борозан кој одигра фантастичен меч, беше нерешлива енигма за противникот полнејќи ја неговата мрежа.

Натпреварот почна со минута молк за жртвите од големата несреќа во Кочани. Почит за нив беше дадено и во 59. минута кога целата сала стана и аплаудираше за 59. жртви кои го загубија животот во страшниот пожар.

Вардар стартуваше моќно во натпреварот, поведе со 3-0, но Алкалоид успеа да се врати и да поведе со 6-5. Сепак вардарци повторно се кренаа и ја вратија предноста од три гола разлика, но противникот не даваше домаќинот да се одлепи. На одморот се замина со водство од 15-13 за Вардар.

Во второто полувреме Вардар имаше тотална контрола на резултатот, не му даде на Алкалоид да се понадева дека може да извлече нешто од овој натпревар. Победникот беше решен далеку пред крајот на натпреварот, а конечниот резултат гласеше 34-26.

Вуко Борозан беше најефикасен на мечот постигнувајќи девет голови иако не ги играше последните 20 минути, голем допринос за победата имаше и голманот Мигел Еспиња со 14 одбрани. Кај Алкалоид најефикасен беше Мартин Серафимов со осум голови.