Од Мутибариќ до Панчев - избран идеалниот тим на Вардар на сите времиња (ФОТО)

Низ историјата на Вардар, од самиот почеток во 1947 година кога е формиран со фузијата на Победа и Македонија, па се до денеска, низ клубот минале многу фудбалски имиња, кои оставиле силен белег и во регионот, ама и низ Европа, па скоро невозможно е да се избере низ стотици врвни фудбалери, кој би бил најдобар на својата позиција за 11 места во идеалниот тим.

Секој избор ќе има „про“ и „контра“, зошто овој или оној, но доста популарната страница се реши да го избере најдобриот од најдобрите тимови. Секако, како и за било кој обид и за овој би имало големи полемики дали некој заслужил повеќе или помалку да се најде во него. Во изборот барем според позицијата лев бек е спорна, а таму е сместен легендарниот Кирил Симоновски – Џина, иако во кариерата не играл како бек, но според објаснувањето на фејсбук-страницата, ниту еден од можните кандидати не бил до толку заслужен за да се најде во ваков тим. Останатите, повеќе или помалку, се очекуван избор.

„Два големи играчи, две врвни леви крила ги преместивме на други позиции за да им отвориме место во идеалниот тим, Џина на лев бек и Мето Спасовски на лев играч за врска. Не знаеме дали ваков тим би бил најфункционален, ама ова се единаесетмината најдобри и најголеми фудбалери во историјата на Вардар“, стои во објаснувањето за изборот

ОВА Е ТИМОТ НА СИТЕ ВРЕМИЊА НА ЦРВЕНО-ЦРНИТЕ

ГОЛМАН – Драган Мутибариќ (пред Благоје Видиниќ и Момчило Грошев)

ДЕСЕН БЕК – Вујадин Станојковиќ (пред Ѓоре Јовановски и Јован Дробац)

ЛЕВ БЕК – Кирил Симоновски – Џина (пред Мирко Спасески и Венцислав Симоновски)

ЛЕВ СТОПЕР – Илија Најдоски (пред Славко Дацевски и Атанас Мечкаров) 

ДЕСЕН СТОПЕР – Кирил Дојчиновски (пред Васко Кокиновски – Макара и Чедомир Јаневски/Бобан Бабунски)

ПОСЛЕДЕН ИГРАЧ ЗА ВРСКА – Кочо Димитривски (пред Драги Канатларовски и Димитар Георгиев)

ДЕСНО КРИЛО – Сократ Мојсов (пред Гордан Здравков и Мирко Илиевски)

ДЕСЕН ИГРАЧ ЗА ВРСКА – Тони Савевски (пред Ванчо Балевски и Пепи Георгиевски)

ЛЕВ ИГРАЧ ЗА ВРСКА – Мето Спасовски (пред Андон Дончевски и Јосиф Сребров)

ЦЕНТАРФОР – Дарко Панчев (пред Петар Шулинчевски и Саша Ќириќ)

ЛЕВО КРИЛО – Васил Рингов (пред Јовче Џипунов)

Втората единаесеторка според изборот ја сочинуваат Благоје Видиниќ – Ѓоре Јовановски, Мирко Спасевски, Драги Канатларовски, Васко Кокиновски, Славко Дацевски, Гордан Здравков, Ванчо Балевски, Петар Шулинчевски, Андон Дончевски, Јовче Џипунов.