Заврши бајката на „сините ајкули“ – Капе Верде се распаѓа по историскиот настап на Мундијалот
Додека голманот Возиња продолжи да бележи успеси на клупски план по завршувањето на Светското првенство, на репрезентативен план се соочува со голема криза. Чуварот на мрежата се пресели во чилеанскиот гигант Коло-Коло, со кој успеа да освои и трофеј, ама националниот тим тргна во сосема спротивна насока.
Падот е особено видлив во квалификациите за Африканскиот куп на нации во 2027 година. Во првите четири натпревари по Мундијалот, Капе Верде забележа дури три порази, од Мали, Руанда и Либерија, во вториот меѓусебен дуел. Единствената победа во овој период беше токму против Либерија, во првата средба, па „сините ајкули“ сè уште имаат математички надежи за пласман, но нивната позиција е значително влошена.
Посебно загрижувачки е падот во одбраната. Капе Верде прими девет гола во овие четири натпревари, односно немаше ниту една средба на која успеа да ја зачува својата мрежа. Тоа е целосен контраст во однос на сигурноста што ја демонстрираше на Светското првенство. Тогаш африканската селекција ги воодушеви љубителите на фудбалот со настапот против Аргентина на „Хард Рок“ стадионот, кога успеа да избори продолженија и покрај поразот од 2-3.
Но, Капе Верде не е единствената селекција која тешко се справува со враќањето во реалноста по светскиот собир. Слична судбина доживуваат и Хаити и Курасао, уште две репрезентации кои беа меѓу изненадувањата на Мундијалот.
Хаити, под водство на шпанскиот тренер Давид Бадија, по три последователни победи во групната фаза од Лигата на нации на КОНКАКАФ, запиша три порази во низа. Курасао, пак, имаше идентичен почеток со три триумфи, но потоа следуваа три неуспеси. Последицата за двете селекции беше иста – останаа без место во полуфиналето на натпреварувањето по поразите од САД и Панама.