Нов потрес во Вест Хем - по испаѓањето од премиер лигата сега останаа и без тренер!

Екипата која важи за еден од главните фаворити за враќање во повисок ранг по минатогодишното испаѓање од Премиер лигата, во моментов се наоѓа дури на осмото место на табелата, мачејќи се да ги оправда високите очекувања. Капката која ја прели чашата за раководството на лондонскиот клуб беше саботниот убедлив пораз на домашен терен од Вест Бромвич Албион (1-3), по кој тимот остана на скромен учинок од само шест победи во 13 одиграни натпревари.

Лондонскиот клуб ја потврди разделбата преку официјално соопштение во кое ги информираше навивачите и јавноста за промените во стручниот штаб.

„Фудбалскиот клуб Вест Хем потврдува дека Нуно Еспирито Санто, главниот тренер на првиот тим, ја напушти својата функција, а одлуката стапува на сила веднаш. По деталната анализа на почетокот на сезоната во Чемпионшип, Управниот одбор смета дека во овој момент е неопходна промена, за да се осигура дека клубот ќе продолжи да ги остварува своите цели и да ги исполнува очекувањата. Клубот исто така го напуштија помошниот тренер Руи Педро Силва и тренерот на голманите Руи Барбоса. Процесот за избор на нов главен тренер е веќе во тек“, соопштија од Вест Хем.

Педесет и двегодишниот португалски стручњак, кој претходно ги водеше екипите на Тотнем, Вулверхемптон и Нотингем Форест, во септември 2025 година потпиша тригодишен договор со „чеканите“. Тој беше пред отказ уште за време на минатата сезона кога тимот испадна од елитата, но управата тогаш му даде доверба да го води процесот на реорганизација. Сепак, тој не успеа да го спречи понатамошното паѓање на екипата по слабиот старт на сезоната во вториот по ранг англиски фудбалски ешалон, што на крајот резултираше со предвремен прекин на соработката.