Лудница на Рим: Рома губеше до 90. минута, па му го расипа првиот старт на Елмас (ВИДЕО)

05 септември 2026 - 22:53

Фудбалерите на Рома ја совладаа екипата на Аталанта (2-1) во луд натпревар од третото коло на италијанската Серија А, откако до трите бода стигнаа со пресврт во судиското продолжение, откако гостите од Бергамо имаа резултатска предност во текот на целото второ полувреме.

Со овој триумф, екипата на Рома, предводена од поранешниот тренер на Аталанта Џан Пјеро Гасперини, го задржа максималниот учинок во првенството и се искачи на врвот на табелата со девет бода, колку што има и актуелниот шампион Интер. Од друга страна, Аталанта, под водство на Маурицио Сари, останува на шест освоени бода. За гостите првпат во стартниот тим беше македонскиот репрезентативец, Елиф Елмас, кој ги одигра воведните 66 минути кога беше заменет во ситуација на водство на неговиот тим.

Домашните имаа иницијатива во првото полувреме и создадоа две сериозни шанси преку Џанлука Манчини во 14. минута и Брајан Кристанте во 21. минута, но одбраната на Аталанта остана несовладана. Гостите од Бергамо поведоа на самиот старт од вториот дел. Шарл Де Кетеларе проби по левата страна и се обиде да го проигра Никола Крстовиќ (кој на полувремето го замени Џанлука Скамака), а по интервенциите на Еван Ендика и Џанлука Манчини, топката стигна до Едерсон, кој со силен удар донесе водство за гостите.

Рома во судиското надополнување го скрши отпорот на противникот. Најпрво Марио Ермосо го израмни резултатот, а веднаш потоа Матијас Суле го постигна победничкиот погодок за римјаните. Овој натпревар доаѓа по уште еден ефикасен дуел во италијанското првенство, во кој претходно Интер славеше над Наполи (3-2) исто така по луд пресврт откако противникот поведе со 2-0.

ФОТО: X / @MatteoDG93