Берокал пресреќен: Покажавме карактер кога беше најважно - Рајт прави огромна разлика!

Поради тоа, селекторот Хозеп Мариа Берокал не го криеше задоволството од пристапот и прикажаниот карактер на неговите избраници. И покрај специфичниот летен термин и краткиот период за подготовка, црвено-жолтите одиграа зрел и тактички дисциплиниран меч, лимитирајќи го противникот на само 59 поени.

„Секогаш е добро кога едно натпреварување ќе се започне со победа. Овој ФИБА ‘прозорец’ беше сосема поинаков од претходните – сред лето, некои играчи можеби сè уште не се во посакуваната натпреварувачка форма, а имавме и многу кратки подготовки. Имаше доста прашалници пред натпреварот околу тоа како ќе изгледаме на теренот, но покажавме дека знаеме и можеме да играме. Извлековме одличен резултат, момците покажаа карактер и ова е само успешен прв чекор,“ истакна македонскиот стратег веднаш по средбата.

Клучот за победата беше токму тимската игра во дефанзива и контролирањето на ритамот низ сите четири четвртини.

„Тимскиот дух најдобро се виде во одбраната. Го задржавме противникот на само 59 поени, што е одличен дефанзивен учинок против шутерска екипа. Ги добивме сите четвртини, а кога ја движиме топката во напад, играме навистина квалитетно. Не е пресудно дали некој ќе погоди или промаши отворен шут, најважен е начинот на кој се игра и како се гради играта,“ потенцираше кормиларот.

Посебен акцент беше ставен на дебито и влијанието на натурализираниот центар Мозес Рајт, кој донесе огромна стабилност и доминација под обрачите.

„Тој дефинитивно треба да биде нашиот главен стожер и референца под кошевите. Играчите од негов калибар се тука за да прават разлика на паркетот, а тоа денес беше повеќе од очигледно. Се надевам дека и во следните предизвици ќе можеме да сметаме на целиот состав,“ заклучи селекторот.

По овој успешен старт, репрезентативците им се враќаат на клупските обврски, а следниот репрезентативен предизвик Македонија ќе го има за два и пол месеци, кога на домашен терен ќе ја пречека селекцијата на Кипар.