Дојдоа да се забавуваат на Ју-ес опен, а си заминаа со - трофеј и милион долари!

За Мухова и Меншик ова е прва заедничка гренслем-титула, откако во полуфиналето претходно ги елиминираа руските претставници Мира Андреева и Андреј Рубљов. Чешкиот тандем во турнирот влезе без големи очекувања, па токму затоа Мухова не го криеше изненадувањето по освоената титула.

„Искрено, не очекував вечерва да стојам тука. Дојдовме само да се забавуваме и да уживаме во играта во мешани двојки, а сега сме тука. Тоа значи дека нешто сме направиле како што треба“, изјави Мухова по финалето.

Турнирот во мешани двојки на Ју-Ес опен се игра со 16 тандеми, а ова е втора година во која се применува обновениот формат, со учество на голем број од најдобрите тенисери и тенисерки во светот. Натпреварувањето се одржува непосредно пред почетокот на главниот турнир во поединечна конкуренција како загревање за играчите, но наградата за победниците е сè само не симболична.

Форматот е скратен во однос на класичните мечеви во двојки. За освојување на сет потребни се само четири освоени гема, додека наместо трет сет се игра решавачки „меч-тајбрејк“ до 10 поени. На турнирот настапија и големи тениски имиња. Новак Ѓоковиќ играше во тандем со Арина Сабаленка, додека Карлос Алкараз настапи заедно со Серена Вилијамс.